Samþykkt með 5 atkvæðum fulltrúa Sjálfstæðisflokksins, Viðreisnar, Framsóknarflokksins og Miðflokksins gegn 2 atkvæðum fulltrúa Samfylkingarinnar.
Lögð fram svohljóðandi bókun fulltrúa Sjálfstæðisflokksins, Viðreisnar og Framsóknarflokksins:
Með samþykkt tillagnanna tveggja, annars vegar um íbúða- og húsagerðir og hins vegar um verslun og þjónustu á jarðhæðum, er aukinn sveigjanleiki tryggður við gerð deiliskipulags. Að jafnaði verði ekki sett stíf bindandi hlutfallsviðmið um stærðir eða herbergjafjölda íbúða á einstökum byggingarreitum nema sérstakar skipulagslegar, félagslegar eða lýðfræðilegar forsendur réttlæti það. Aukið svigrúm uppbyggingaraðila þarf þó að haldast í hendur við markmið um fjölbreytt húsnæði og mat á áhrifum íbúðasamsetningar á skóla, samgöngur, þjónustu og félagslega samsetningu hverfa. Krafa um tiltekna atvinnu-, verslunar- eða þjónustustarfsemi á jarðhæðum verði aðeins sett þar sem staðsetning, raunhæf eftirspurn og skipulagsmarkmið gefa tilefni til. Á stærri uppbyggingarsvæðum þarf áfram að tryggja nægilegt rými fyrir nærþjónustu og virkar jarðhæðir á réttum stöðum. Sviðið skýri jafnframt hvað felist í virkum eða lifandi jarðhæðum, meðal annars með hliðsjón af nærþjónustu, aðlaðandi götumynd og því að íbúðir séu ekki staðsettar í rýmum sem henta illa til búsetu.
Lögð fram svohljóðandi bókun fulltrúa Samfylkingarinnar og áheyrnarfulltrúa Vinstrisins:
Borgarskipulag snýst um að gæta almannahagsmuna til framtíðar og tryggja að uppbygging innviða haldist í hendur við íbúaþróun, lífsgæði íbúa og öryggi. Þær tillögur sem hér eru bornar fram birtast sem dulbúin árás á sjálfbæra byggð, 15-mínútna hverfið og ábyrga innviðaáætlanagerð. Þegar tillögurnar eru skoðaðar í samhengi við afnám á hámarksfjölda bílastæða og 90% afslátt af gatnagerðargjöldum neðanjarðar, blasir við hættuleg sýn: Að afnema nánast allan skipulagsramma borgarinnar og framselja vald yfir hverfaþróun til frjáls markaðar - sem bera enga ábyrgð á heildarmyndinni. Varðandi verslunar- og þjónusturými: Sýn okkar á Reykjavík byggir á því að nærþjónusta og mannlíf eigi sér stað í göngufæri við íbúa. Neikvæð umræða um lifandi verslunar- og þjónusturými á jarðhæðum horfir fram hjá því að það tekur tíma fyrir ný hverfi að þroskast og ná þeim íbúafjölda sem ber uppi rekstur. Ef gefist er upp í upphafi og öllum jarðhæðum breytt í íbúðir, er varanlega lokað á að hverfisbakarí, verslun, kaffihús eða nærþjónusta geti vaxið með hverfinu. Þar að auki sýnir reynslan að íbúðir á jarðhæðum við umferðarþungar götuhliðar bjóða upp á skert búsetugæði og skapa dauðar götumyndir. Samfylkingin styður að jarðhæðir séu hannaðar með sveigjanleika til að geta tekið breytingum yfir tíma, en hafnar því að sleppa stýringu á virkum götuhliðum. Borg án skipulagsstýringar verður hvorki ódýrari, skilvirkari né betri; hún verður einfaldlega handahófskenndari, verri fyrir íbúa og dýrari fyrir útsvarsgreiðendur sem standa eftir með reikninginn fyrir ófyrirséðum innviðum.