Samþykkt er að kynna lýsingu nýs deiliskipulags í samræmi við 1. og 3. mgr. 40. gr. skipulagslaga nr. 123/2010. Leita skal umsagna um lýsinguna hjá Skipulagsstofnun, Isavia, Minjastofnun Íslands, Borgarsögusafni, Strætó bs., Veitum, Vegagerðinni og eftirtöldum deildum, skrifstofum og sviðum Reykjavíkurborgar: skrifstofu framkvæmda og fasteignaþjónustu, skrifstofu umhverfisgæða, skrifstofu samgangna og borgarhönnunar, Heilbrigðiseftirliti Reykjavíkur, skóla- og frístundasviði og kynna hana fyrir almenningi.
Lögð fram svohljóðandi bókun fulltrúa Sjálfstæðisflokksins:
Fulltrúi Sjálfstæðisflokksins tekur jákvætt í þá vinnu sem felst í þróun lífsgæðakjarna og uppbyggingu á Loftleiðareit og telur að þar geti skapast áhugaverð blönduð byggð með fjölbreyttri þjónustu. Sérstaklega er brýnt að skýr afstaða verði tekin til bílastæðaþarfar og umferðar vegna fjölbreyttrar starfsemi á reitnum. Þá er mikilvægt að tekið sé með markvissum hætti á áhrifum flugumferðar og hávaða á íbúa og viðkvæma hópa. Einnig er æskilegt að betur verði kveðið á um vernd og varðveislu byggðar sem hefur viðurkennt menningarsögulegt gildi. Fulltrúi Sjálfstæðisflokksins styður að skipulagslýsingin verði samþykkt til kynningar til að kalla fram athugasemdir íbúa og hagaðila á svæðinu.
Lögð fram svohljóðandi bókun áheyrnarfulltrúans Mörtu Guðjónsdóttur:
Ofurþéttingaráform meirihlutans eiga sér engin takmörk. Gengið er á græn svæði í borgarlandinu og nú er það grænn blettur í horni svokallaðs Loftleiðareits þar sem liggur fyrir skipulagslýsing um fyrirhugaða uppbyggingu sem er alveg ofan í Reykjavíkurflugvelli. Markmiðið með slíkri uppbyggingu á þessu svæði er að þrengja enn og aftur að Reykjavíkingurflugvelli enda gæti uppbygging á þessu svæði haft áhrif á rekstrarhæfi flugvallarins og nothæfisstuðul vallarins. Liðsmenn Miðflokksins í borgarstjórn Reykjavíkur geta ekki fallist á uppbyggingu í nágrenni eða á flugvallarsvæðinu sem skerða nothæfisstuðul og rekstrargrundvöll vallarins.