Lögð fram svohljóðandi bókun áheyrnarfulltrúa Flokks fólksins:
Fulltrúi Flokks fólksins vill taka fram að þrátt fyrir ítarlegt svar er alveg ljóst að röð mistaka virðist hafa átt sér stað hvað þessa framkvæmd varðar. Það versta í þessu öllu er það að framkvæmdir skuli ekki hafa verið stöðvaðar strax þegar þess var óskað - þó að ekki væri nema rétt á meðan málið væri til umfjöllunar og leiðir skoðaðar til úrbóta - ef einhverjar eru. Skipulagsslys sem þetta eru í raun sjaldséð. Það er með hreinum ólíkindum að nánast hvergi á leiðinni hafi einhver skipulagseining innan borgarinnar gert við þetta athugasemdir. Það er öllum ljóst að iðnaðar- og geymsluhúsnæði af þessari stærðargráðu á alls ekki heima á þessum stað. Sambland íbúabyggðar, létts iðnaðar og þjónustu getur stundum hentað - en þetta er eitthvað allt annað og meira. Í svari er rakin ákveðin tímalína sem og hin og þessi stig framkvæmda. Nú er búið að kæra framkvæmdina og þess vegna ljóst að þessu máli er alls ekki lokið. Nú þarf að ítreka þá ósk að framkvæmdir verði stöðvaðar til þess að reyna að minnka þann skaða sem nú þegar er orðinn. Það eru borgarbúar sem á endanum sitja uppi með þann kostnað sem mögulega af þessum ósköpum öllum mun verða.