Lögð fram svohljóðandi bókun áheyrnarfulltrúa Flokks fólksins:
Fulltrúi Flokks fólksins þakkar svarið en vill um leið minna á að þétting byggðar þarf líka að eiga sér stað í meira mæli í þeim hverfum borgarinnar þar sem innviðir eru til staðar ásamt óskum íbúa um meiri byggð eins og á Kjalarnesi - í stað þess að halda áfram að þétta byggð á þeim svæðum þar sem mikil uppbygging hefur nú þegar átt sér stað. Það er ekkert því til fyrirstöðu að skoða þéttingu á þeim svæðum seinna. Það þarf að hugsa þetta í stærra samhengi og huga að aukinni umferð og álagi á innviði sem óhjákvæmilega fylgir þéttingu byggðar í fjölmennari hverfum. Lagning Sundabrautar ásamt uppbyggingu nýrra hverfa í Keldnaholti og á Kjalar- og Geldinganesi er það sem Höfuðborgarsvæðið þarf virkilega á að halda þegar litið er til þéttingu byggðar - burtséð frá því hvenær borgarlínan verður til. Það er hægt að skipuleggja hverfi þrátt fyrir að borgarlínan sé komin eða ekki. Í því samhengi vill fulltrúinn minna á að nú þegar er smærri útgáfa af borgarlínu í gangi á höfuðborgarsvæðinu - undir nafninu Strætó Bs.