Samþykkt með 5 atkvæðum fulltrúa Samfylkingarinnar, Pírata, Sósíalistaflokks Íslands, Vinstri grænna og Viðreisnar að auglýsa framlagða tillögu, skv. 1. mgr. 41. gr. sbr. 1. mgr. 43. gr. skipulagslaga nr. 123/2010. Fulltrúi Sjálfstæðisflokksins greiðir atkvæði gegn tillögunni. Fulltrúi Framsóknarflokksins situr hjá við afgreiðslu málsins.
Vísað til borgarráðs.
Lögð fram svohljóðandi bókun fulltrúa Sjálfstæðisflokksins:
Borgarfulltrúi Sjálfstæðisflokksins leggst eindregið gegn fyrirliggjandi þéttingaráformum við Hverafold. Enn á ný ætlar meirihlutinn að þrengja að grónu hverfi Grafarvogs þrátt fyrir skýra andstöðu íbúa. Met var sett í athugasemdum við mál í Skipulagsgátt fyrir ári þegar 1.386 athugasemdir bárust við þéttingaráform meirihlutans í borginni, nánast allar neikvæðar. Þessi tillaga gerir ráð fyrir allt að 36 íbúðum á svæði þar sem 73 bílastæði við Foldatorg hverfa. Þá er gert ráð fyrir að 140 bílferðir bætist við daglega. Tillagan er óraunhæf, mun mæta mikilli andstöðu og verður átakamál í nærumhverfinu. Óskiljanlegt er að núverandi meirihluti ætli enn og aftur í átök við íbúa Grafarvogs.
Lögð fram svohljóðandi bókun fulltrúa Framsóknarflokksins:
Framsókn situr hjá við afgreiðslu málsins. Þar sem kosningar eru í nánd þá telur fulltrúi Framsóknar eðlilegt að bíða með áframhaldandi vinnu með deiliskipulag í Grafarvogi þar til þeim er lokið, sérstaklega í ljósi þess hversu umdeildar þær þykja.
Lögð fram svohljóðandi bókun áheyrnarfulltrúans Mörtu Guðjónsdóttur:
Miðflokkurinn leggst alfarið gegn öllum þéttingaráformum í grónum hverfum Grafarvogs og leggur til að fallið verði tafarlaust frá slíkum áformum enda eru þéttingaráformin í mikilli andstöðu við íbúa eins og margoft hefur komið fram á íbúafundum. Nú á að herja á útivistar- og opin svæði í Grafarvoginum. Grænu svæðin hafa ekki farið varhluta af ofþéttingarstefnu meirihlutans og nú á að nýta hvern einasta græna blett í grónum hverfum Grafarvogs til uppbyggingar. Lítið er að marka meirihluta sem kennir sig við umhverfisvernd en ætlar á sama tíma að halda sig við að nýta hvern einasta græna blett og opin svæði í Grafarvoginum til uppbyggingar sem kemur niður á lífsgæðum íbúa. Í aðalskipulaginu er lögð áhersla á gæði byggðar sem samræmist engan veginn þeirri stefnu að þétta byggð á kostnað þeirra örfáu grænu svæða sem eftir eru í borgarlandinu.