Tillögunni er vísað frá með 4 atkvæðum fulltrúa Samfylkingarinnar, Pírata, Sósíalistaflokks Íslands og Flokks fólksins. Fulltrúar Sjálfstæðisflokksins og Framsóknarflokksins greiða atkvæði gegn frávísun málsins.
Lögð fram svohljóðandi bókun fulltrúa Samfylkingarinnar, Pírata, Sósíalistaflokks Íslands, Flokks fólksins og áheyrnarfulltrúa Vinstri grænna:
Efni tillögunnar er þegar í vinnslu byggt á áður samþykktri tillögu, eins og kemur fram í umsögn. Því er tillögunni vísað frá.
Lögð fram svohljóðandi bókun fulltrúa Sjálfstæðisflokksins:
Borgarfulltrúar Sjálfstæðisflokksins hafa margoft lagt til að skjólgóð og upphituð biðskýli verði sett upp á fjölförnum biðstöðvum í Reykjavík. Of hægt hefur gengið að koma umræddum tillögum Sjálfstæðisflokksins til framkvæmdar og er eindregið hvatt til þess að bætt verði úr því. Tillögurnar hafa m.a. kveðið á um að slíkum skýlum yrði komið fyrir við Háskóla Íslands, Háskólann í Reykjavík og flesta framhaldsskóla. Tillögurnar hafa bæði verið fluttar á vettvangi borgarstjórnar og umhverfis- og skipulagsráðs. Hinn 26. júní 2024 samþykkti umhverfis- og skipulagsráð tillögu Sjálfstæðisflokksins um að upphituðu biðskýli yrði komið fyrir við skiptistöð Strætó bs. við Skúlagötu. Það skýli hefur þó enn ekki verið sett upp. Upphituð biðskýli hafa lengi verið í notkun erlendis og sannað er að þau bæta heildarupplifun farþega og stuðla þannig að fjölgun þeirra. Með aukinni útbreiðslu hafa slík biðskýli orðið ódýrari í innkaupum og hagkvæmari í rekstri en áður. Orkukostnaður er þó mun lægri í Reykjavík en í ýmsum erlendum borgum þar sem slík skýli er þó að finna.