Lögð fram umsagnarbeiðni Mosfellsbæjar, dags. 8. janúar 2026, þar sem óskað er eftir umsögn Reykjavíkurborgar um tillögu á vinnslustigi fyrir nýtt deiliskipulag austurhluta Hlíðavallar. Tillagan felur í sér að endurskipuleggja austurhluta Hlíðavallar með það að markmiði skapa spennandi og heildstætt íþróttasvæði, þar sem golfbrautir eru færðar, styttar eða endurhannaðar, nýjum brautum bætt við utan núverandi vallarmarka (í samræmi við aðalskipulagsbreytingu í kynningu) og skýrari aðgreiningu náð milli ólíkra notendahópa. Markmið er að bæta öryggi og draga úr hættu á líkams- og eignatjóni vegna golfbolta, samhliða því að tryggja áframhaldandi og örugga samvist golfíþróttar, útivistar, stíga og reiðleiða. Útfærsla tillögunnar byggir á markvissri landmótun, nýju stígakerfi, undirgöngum, bættri yfirsýn og fjarlægðum, ásamt skýrum skilmálum, merkingum og mótvægisaðgerðum. Tillagan felur jafnframt í sér uppbyggingu nýs æfingavallar (par-3) sem eykur aðgengi að golfíþróttinni, styður við barna-, nýliða- og almenningsnotkun og bætir öryggi með styttri brautum og betri nýtingu íþróttasvæðisins. Einnig eru lagðir fram deiliskipulags- og skýringaruppdrættir (vinnsludrög), dags. 2. desember 2025, auk greinargerðar, dags. í janúar 2026, og fylgiskjölum.
Ekki eru gerðar skipulagslegar athugasemdir við erindið.