Samkvæmt fasteignaskráningu er húsið enn skráð á byggingarstigi 1 þótt það sé fullbyggt og hafi verið tekið í notkun, og að lögboðnar úttektir hafi ekki farið fram, þar á meðal fokheldisúttekt. Samkvæmt skilmálum átti húsið að skilast fokhelt 7. október 2008 og fullbúið 7. apríl 2009. Skipulags- og byggingarráð gerði 03.11.2009 eigendum og byggingarstjóra skylt að veita upplýsingar um málið innan tveggja vikna. Bærust þær ekki yrði málinu vísað til bæjarstjórnar með tillögu um dagsektir skv. 57. grein skipulags- og byggingarlaga nr. 73/1997. - Komið hefur í ljós að eigendur eru einungis búnir að stúka af eitt bil og fá þar af leiðandi ekki fokheldisvottorð. Fokeldi var synjað 06.06.2009 þar sem vantaði brunahólfandi veggi og þá vantar enn. Eigendur eru samt búnir að þinglýsa eignaskiptasamningi og skuldbinda sig þar með að skipta húsinu í 8 eignir. Skipulags- og byggingarfulltrúi leitaði álits lögfræðings skipulags- og byggingarsviðs, sem nú liggur fyrir. Byggingarstjóri sagði sig af verki 03.02.10. Skipulags- og byggingarfulltrúi gerði 03.11.10 eigendum skylt að skrá byggingarstjóra á verkið og sækja á ný um fokheldisúttekt innan 3 vikna. Yrði það ekki gert yrði erindinu vísað til skipulags- og byggingarráðs með tillögu um dagsektir í samræmi við 57. grein skipulags- og byggingarlaga nr. 73/1997. Ekki hefur verið brugðist við erindinu. Erindið var til umfjöllunar á afgreiðslufundi skipulags- og byggingarfulltrúa 08.12.2010, sem vísaði því til skipulags- og byggingarráðs með eftirfarandi tillögu: "Skipulags- og byggingarráð gerir eigendum skylt að skrá byggingarstjóra á verkið og sækja á ný um fokheldisúttekt innan 3 vikna. Verði það ekki gert verður erindinu vísað til bæjarstjórnar með tillögu um dagsektir í samræmi við 57. grein skipulags- og byggingarlaga nr. 73/1997."