Bókanir og gagnbókanir

• Miðflokkur
  Lagt var af stað í þá vegferð að bjóða út smáhýsi fyrir heimilislausa en skyndilega var hætt við og farið í nýtt útboð. Eyða á 450 milljónum í kaup á 25 smáhýsum. Nú hefur komið í ljós að ekki er hægt að koma húsunum fyrir. Eins og staðan er núna er ljóst að mikill kostnaður á eftir að bætast við bæði að hálfu borgarinnar og Veitna. Nú er verið að gera tillögu að "skerpa" á landnotkunarheimildum í aðalskipulagi um hvar heimilt er að staðsetja búsetuúrræði innan borgarinnar, því breyta þarf deiliskipulagi fyrir þessi hús. Verið er að búa til nýtt sérákvæði um sérstök búsetuúrræði og verði þessi skipulagsbreyting keyrð í gegn þá er verið að opna pandórubox í skipulagsmálum sem ekki sér fyrir endann á. Samkvæmt þessari breytingu verður hægt að drita niður smáhýsum, kofum, tjöldum, hjólhýsum, húsbílum og öllu því sem kallast getur íverustaður út um allt borgarlandið án þess að nokkur fái við það ráðið. Þessi breyting stenst ekki lög og nauðsynlegt er að fá álit/úrskurð samgöngu - og umhverfisráðuneytanna á fyrirhuguðum breytingum. Varað er við þessum vinnubrögðum og hvatt til þess að málefni húsnæðislausra verði leyst með öðrum hætti s.s. með kaupum á gistiheimilum eða hótelum.
• Sjálfstæðisflokkur
  Hér er tækifæri fyrir aðila að koma sjónarmiðum sínum á framfæri vegna þessara breytingar á aðalskipulagi sértækra búsetuúrræða. Íbúasamtök og íbúaráð munu nú geta komið athugasemdum á framfæri. Framkvæmd sértækra búsetuúrræða hefur tafist um langa hríð vegna staðsetninga og skorts á heimildum. Kaup á smáhýsum fyrir hundruði milljóna króna hafa ekki nýst þeim sem þau þurfa.