Svar

Fulltrúi Pírata Sigurborg Ósk Haraldsdóttir, fulltrúar Samfylkingarinnar Kristín Soffía Jónsdóttir og Hjálmar Sveinsson og fulltrúi Viðreisnar Gunnlaugur Bragi Björnsson bóka:Við þökkum skrifstofu byggingarfulltrúa fyrir vandaða og skýra ársskýrslu sem gefur gott yfirlit yfir samþykktar byggingarleyfisumsóknir, byggingarmagn, útgefin byggingarleyfi og fleiri verkefni byggingarfulltrúans á árinu 2018.Skýrslan sýnir glöggt að árið 2018 var algjört metár í byggingarsögu borgarinnar, enda voru met slegin í nær öllum flokkum. Þar má nefna að á árinu 2018 var hafin bygging á metfjölda íbúða, eða 1.417 íbúðum en fyrra met voru 1.133 íbúðir árið 1973. Sá fjöldi íbúða samsvarar fjölda íbúða í Foldahverfi og hálfu Húsahverfi, eða rétt tæplega heildarfjölda íbúða á Seltjarnarnesi. Sömuleiðis hefur samþykkt byggingarmagn aldrei verið meira og mótteknir uppdrættir aldrei fleiri. Einnig er ánægjulegt að hlutfall íbúða af samþykktu byggingarmagni eykst á milli ára en sama á við um hlutfall húsnæðis fyrir iðnað, hótel og veitingahús. Ársskýrsla byggingarfulltrúa staðfestir að Reykjavík er lifandi borg í örum vexti. Áframhaldandi kraftur í uppbyggingu íbúða, þjónustu- og atvinnuhúsnæðis, almenningssamgangna og annarra innviða mun gera góða borg betri - öllum til góða.