Gísli Ó. Valdimarsson tók á ný sæti á fundinum. Skipulags- og byggingarráð felur skipulagshöfundi að vinna áfram framlagða breytingartillögu að deiliskipulaginu og undirbúa hana til auglýsingar skv. 1. mgr. 26. greinar skipulags- og byggingarlaga á næsta fundi. Fulltrúar Sjálfstæðisflokks og Vinstri Grænna taka undir að farið verði í frekari vinnu vegna deiliskipulagsins en ítreka þá skoðun sína að full ástæða hefði verið til að hafa fulltrúa minnihlutans með í ráðum við undirbúning málsins. Skipulags- og byggingarráð fékk ákvörðun um breytingar aldrei til formlegrar umsagnar eða afgreiðslu eins og venja er í mikilvægum málum. Ekki sé nóg að viðhafa samráð og samvinnu í orði en ekki á borði. Fulltrúar Samfylkingar meta það svo að fullt samráð hafi verið haft við minnihlutann sbr. minnisblað sviðsstjóra um ferli málsins sem hófst á vordögum 2009. Það vekur furðu Samfylkingarinnar að minnihlutinn skuli ekki skoða ferli málsins hingað til sem formlegt auk þess sem nú er verið að ákveða að hefja vinnu við breytingu á deiliskipulaginu. Fulltrúar Sjálfstæðisflokks og Vinstri Grænna gera sér grein fyrir ferli málsins og þeim umræðum sem áttu sér stað en ítreka að engin ákvörðun var tekin um að farið yrði í kostnaðarsama vinnu arkitekta við breytingar á deiliskipulagi á Völlum 7, sem nú þegar nemur rúmri einni milljón króna. Fulltrúar Samfylkingar benda á að sú vinna sem hefur farið fram við skoðun á skipulaginu hefur fallið undir liðinn tilfallandi verkefni sem í þessu tilfelli var notaður til að bregðast við óskum MIH og skipulagshöfundur fenginn til verksins. Þetta á minnihlutinn að vera meðvitaður um. Fulltrúi Sjálfstæðisflokksins segir:Formaðurinn er skemmtilegur. Formaður ráðsins þakkar hólið.