Til máls tekur Valdimar Víðisson, Árni Rúnar Þorvaldsson og Jón Ingi Hákonarson.
Árni Rúnar Þorvaldsson kemur að svohljóðandi bókun:
Bæjarfulltrúar Samfylkingarinnar lýsa vonbrigðum með að ekki hafi reynst vilji hjá Framsóknarflokknum að mynda félagshyggjumeirihluta. Eðlilegt hefði verið að láta reyna á myndun slíks meirihluta þar sem Samfylkingin og Framsóknarflokkurinn voru sigurvegarar kosninganna. Framsóknarflokkurinn missti einfaldlega kjarkinn og niðurstaðan er því áframhaldandi meirihlutasamstarf Framsóknar- og Sjálfstæðisflokks þar sem fá af aðalkosningamálum Framsóknarflokksins hafa ratað í málefnasamning flokkanna. Ekkert er minnst á óhagnaðardrifin leigufélög eða fjölgun félagslegs húsnæðis í málefnasamningnum. Ekki er þar heldur að finna neitt um gjaldfrjálsan leikskóla eins og Framsóknarflokkurinn ræddi í kosningabaráttunni.
Við okkur blasir hins vegar mjög almennt orðaður málefnasamningur og fátt í honum sem hönd er á festandi og ekki í nokkru samræmi við hin fjölmörgu loforð flokkanna í kosningabaráttunni. Þessi meirihluti er því fyrst og fremst samkomulag um skiptingu bæjarstjórastólsins í eitt kjörtímabil en ekki um málefnin. Orkan sem fór í að komast að samkomulagi um bæjarstjórastólinn virðist hafa valdið því að ekki einu orði er vikið að stærstu áskorunum og verkefnum stjórnvalda í dag, loftslagsmálum og almenningssamgöngum. Umhverfis- og náttúruvernd eru að sama skapi lítt sýnileg málefnasamningnum. Þessi stóru og brýnu mál sem varða framtíð okkar allra hafa ekkert vægi hjá nýmynduðum meirihluta Framsóknar- og Sjálfstæðisflokks í Hafnarfirði.
Samfylkingin mun hér eftir sem hingað til styðja öll góð mál sem frá meirihlutanum koma og berjast fyrir þeim málum sem jafnaðarmenn lögðu á oddinn í kosningabaráttunni. Á sama tíma munum við veita meirihluta Framsóknar- og Sjálfstæðisflokks kröfutgt og málefnalegt aðhald á kjörtímabilinu og berjast þannig fyrir hagsmunum bæjarbúa með jöfnuð og réttlæti að leiðarljósi.