Liður 1 á fundi Hafnarstjórnar þann 6. mars 2019.
Malbikunarstöðin Hlaðbær-Colas hf. sótti um á fundi skipulags- og byggingarráðs þann 23.10.2018, að sameina lóðirnar Óseyrarbraut 16 og 20. Óskað er eftir breytingu á deiliskipulagi lóðanna, sem felur í sér sameiningu lóðanna, breytingu á byggingarreit, nýtingarhlutfall verði 0,3 og að kvöð um lagnir á milli lóðanna tveggja verði felld niður. Skipulags- og byggingarráð samþykkti þá framlagða tillögu að breyttu deiliskipulagi. Erindið var tekið fyrir á fundi Hafnarstjórnar þann 12.12.2018, sem gerði ekki athugasemd við framkomna tillögu að deiliskipulagsbreytingu vegna Óseyrarbrautar 16-20.
Á fundi Skipulags- og byggingarráðs þann 26.02. 2019 var lögð fram ný breytt tillaga sem gerir grein fyrir breyttum innkeyrslum, nýrri lóð á skipulagssvæðinu fyrir spennistöð, auk framgreindra atriða. Skipulags- og byggingarráð samþykkti framlagðar breytingar á deiliskipulagsuppdrætti Mannvits ehf, dags. feb. 2019, og að tillagan verði auglýst í samræmi við 1.mgr. 43.gr. skipulagslaga nr. 123/2010. Jafnframt var lagt til við hafnarstjórn að staðfesta framangreinda samþykkt og gera tillögu til bæjarstjórnar til staðfestingar. Guðrún Guðmundsdóttir arkitekt á umhverfis- og skipulagssviði mætti til fundarins og kynnti skipulagstillöguna.
Hafnarstjórn tekur undir niðurstöðu Skipulags- og byggingarráðs þann 26.02. 2019 og leggur til við bæjarstjórn að staðfesta framangreinda samþykkt.