Svar

Skýrsla starfshópsins lögð fram. Starfshópurinn hefur nú lokið störfum og bæjarráð þakkar honum fyrir sín störf.

Adda María Jóhannsdóttir leggur fram svohljóðandi bókun:

Skýrsla starfshóps um uppbyggingu á Ásvöllum er að mörgu leyti vel unnin og greinargott plagg. Í umræðum um uppbyggingu íþróttamannvirkja í bæjarfélaginu hefur mikilvægi uppbyggingar á Ásvöllum verið flestum ljós og brýnt að bæta þar aðstöðu til knattspyrnuiðkunar innanhúss. Engu að síður eru atriði í skýrslu hópsins um uppbyggingu á svæðinu sem undirrituð vill vekja athygli á.

Í skýrslunni er talað um að Haukar samþykki að leggja til hluta af sínu svæði til íbúðauppbyggingar sem komi á móti framlagi Hafnarfjarðarbæjar til uppbyggingar á knatthúsi á Ásvöllum. Undirrituð setur spurningamerki við þessa framsetningu, þ.e. sú ráðstöfun að ágóði sem hlýst af íbúðauppbyggingu í bæjarfélaginu sé eyrnarmerktur uppbyggingu íþróttamannvirkis á ákveðnu svæði. Í því samhengi má velta fyrir sér aðstöðumun milli íþróttafélaga þar sem fá eru í þeirri stöðu að geta notað land sem skiptimynd fyrir uppbyggingu íþróttamannvirkja.

Uppbygging íþróttamannvirkja er pólitísk ákvörðun og peningarnir sem í það fara koma úr bæjarsjóði með einum eða öðrum hætti. Íbúðauppbygging á umræddu svæði mun vissulega skila tekjum til bæjarsjóðs rétt eins og íbúðauppbygging á öðrum stöðum í bæjarfélaginu. Verði tekin pólitísk ákvörðun um að fara í uppbyggingu á knatthúsi á Ásvöllum fyrir ríflega 2 milljarða á það að vera óháð innstreymi tekna í bæjarsjóð af lóðasölu og ber því að taka ákvörðunina á þeim forsendum.

Annað sem ekki er tekið til í skýrslunni en mikilvægt er að huga að lýtur að skipulagsmálum. Þannig eru ekki tilgreind möguleg áhrif uppbyggingar af 100 íbúðum á þessu svæði á leik- og grunnskóla í hverfinu sem margir eru komnir að þolmörkum varðandi nemendafjölda. Ekki er heldur gerð úttekt á umferðarflæði vegna fyrirhugaðrar byggðar sem mun auka umferðarþunga við íþróttasvæðið þar sem m.a. fjöldi skólabarna er á ferð á degi hverjum. Mikilvægt er að allir innviðir séu teknir til skoðunar áður en endanleg ákvörðun verður tekin um tillögur hópsins.