Svar

Guðlaug Kristjánsdóttir fulltrúi Bæjarlista leggur fram svohljóðandi bókun:
Í dag, 25. september 2018 hafa verið lagðar fram 3 fundargerðir Kaplakrikahóps, frá 16. ágúst, 22. ágúst og 21. september sl.
Fundargerðirnar staðfesta að ekki liggur fyrir verðmat á þeim byggingum sem til stendur að bærinn taki yfir frá FH (og á þegar að hluta), enda bókað þann 21. sept að gera þurfi verðmat sem fyrst. Upphæðin í rammasamkomulaginu virðist því einungis styðjast við framsettan byggingarkostnað í áætlun FH (rétt ríflega það reyndar).
Fram kemur að byggingarleyfi fyrir framkvæmdinni er útrunnið og að þann 21. sept er ný umsókn í vinnslu.
Þann 21. september er bókað að rætt hafi verið um hvernig hægt sé að mæla framvindu verksins, en í erindisbréfi hópsins er kveðið á um að greiðslur skuli inntar af hendi í samræmi við fjárhagsáætlun bæjarins og framvindu verksins.
Samþykktar hafa verið greiðslur upp á 170 milljónir króna, þó ekki liggi fyrir hvernig mæla skuli framvinduna og byggingarleyfi liggi ekki fyrir.

Adda María Jóhannsdóttir fulltrúi Samfylkingar leggur fram svohljóðandi bókun:
Fulltrúi Samfylkingar fagnar því að fundargerðir Kaplakrikahóps séu loks birtar og kynntar í bæjarráði. Nú er ljóst að hópurinn hefur fundað a.m.k. þrisvar, þann 16. og 22. ágúst og 21. september sl. Óskað er eftir formlegum skýringum á því hvers vegna fundargerðir hafa ekki verið birtar eða kynntar í bæjarráði fyrr en nú, þegar ljóst er skv. erindisbréfi að hópurinn starfar í umboði bæjarráðs og fjárheimildir skuli vera fyrir útgjöldum. Í ljósi upplýsingaskyldu, er einnig óskað formlegra skýringa á því hvers vegna legið hefur verið á þessum gögnum í margar vikur, annars vegar út frá markmiðum um ábyrgð, traust og gagnsæi sem sett eru fram í upplýsingastefnu Hafnarfjarðarbæjar og hins vegar gagnvart bæjarfulltrúum þegar skýrt er kveðið á um aðgengi bæjarfulltrúa að gögnum í 1. gr. verklagsreglna, sem og 20. gr. samþykkta um stjórn Hafnarfjarðarkaupstaða og 28. gr. sveitarstjórnarlaga.
Einnig er farið fram á að að verkáætlanir og mat á framvindu verks sem vísað er til í fundargerðum séu birtar með fundargögnum. Eins að þeir samningar sem fundargerðir vísa til séu settir undir fylgigögn með málinu.
Þá er óskað formlegara svara við því hvað í erindisbréfi Kaplakrikahópsins gefi tilefni til að áætla að hópurinn hafi heimildir til að greiða út úr bæjarsjóði, fyrst 100 milljónir og nú 70 milljónir skv. fundargerð frá 21. september sl.