Lögð fram eftirfarandi tillaga. "Bæjarstjórn Hafnarfjarðar samþykkir að kalla eftir því að heilbrigðisráðherra taki ábyrgð á framtíð bygginga St. Jósepsspítala og undirbúi hið fyrsta og hrindi í framkvæmd forvalsferli þar sem áhugasömum aðilum verði gefið tækifæri til að leggja fram hugmyndir sínar að framtíðarnýtingu fasteignanna." Geinargerð: Hingað til hefur öllum hugmyndum og tillögum bæjaryfirvalda í Hafnarfirði um mögulega nýtingu á húsnæði St. Jósepsspítala verið hafnað. Hafa byggingarnar verið látnar standa auðar allt frá því að starfsemi St. Jósepsspítala var lögð niður í kjölfar sameiningar við Landsspítala Háskólasjúkrahúsi. Með bréfi dagsettu 14. mars 2013 kynntu bæjaryfirvöld í Hafnarfirði ríkinu tillögur og hugmyndir um með hvaða hætti nýta mætti húsnæði St. Jósefsspítala í þágu nærsamfélagsins í bænum. Í tillögunum fólst að ríkið afsalaði sér eignarhlut sínum í fasteignunum en Hafnarfjarðarbær tryggði húsnæðinu verðugt hlutverk í almannaþágu, fjármagnaði endurbætur þess og breytingar og stæði undir rekstri þeirrar starfsemi sem þar yrði. Óskuðu bæjaryfirvöld samhliða eftir viðræðum við ríkið vegna málsins. Í yfirlýsingu sem núverandi heilbrigðisráðherra birti 4. júní 2013 kom fram að á því rúma ári sem húsnæðið hefði staðið autt hefðu verið unnin skemmdarverk á byggingunum, rúður brotnar og krotað á veggi. Þar kom einnig fram að ráðast þyrfti í umtalsverðar breytingar og endurbætur á húsnæði St. Jósefsspítala óháð því hvaða starfsemi myndi verða þar. Ráðherra lýsti því einnig yfir að hann teldi æskilegt að viðræður við bæjaryfirvöld vegna málsins gætu hafist sem fyrst. Á fundi bæjarráðs þann 18. júli 2013 var lagt fram svar heilbrigðisráðherra við fyrrnefndu erindi bæjarins. Í erindinu var tillögu bæjarins hafnað. Á grundvelli þeirra viðbragða ráðherra samþykkti bæjarráð að senda ráðherra annað erindi þar sem kallað væri eftir fyrirætlunum ríkisins varðandi fasteignir St. Jósepsspítala, hvort til stæði að nýta þær undir starfsemi á sviði heilbrigðismála, aðra starfsemi á vegum ríkisins eða setja þær í söluferli. Því erindi sem sent var um miðjan júlí 2013 hefur enn ekki verið svarað. Fyrirspurnum bæjaryfirvalda til Fasteigna ríkisins, m.a. í tengslum við mögulega nýtingu húsnæðisins undir aðstöðu fyrir lítil nýsköpunarfyrirtæki hefur ekki verið svarað formlega.