Brugðist hefur verið við innkominni athugasemd hestamannafélagsins Sleipnis og umsögnum umsagnaraðila með óverulegri breytingu á deiliskipulagstillögu. Í kjölfar athugasemda Sleipnis eru felldir út göngustígar og gróðurbelti sem sýnt var fyrir utan deiliskipulagssvæðis og því ekki sýndar neinar framkvæmdir utan skipulagðs íbúðarsvæðis skv. tillögu að aðalskipulagi. Fyrir liggur að skipa starfshóp með hestamannafélaginu til þess að yfirfara og skipuleggja svæði hestamannafélagsins til framtíðar. Það er eindreginn vilji skipulags- og byggingarnefndar að vel takist til í þeirri vinnu og framtíð hestamannafélagsins á núverandi stað verði tryggð með góðum framtíðarmöguleikum. Ekki rétt farið með það í athugasemd hestamannafélagsins að ekkert deiliskipulag sé í gildi fyrir svæðið. Hið rétta er að deiliskipulag fyrir svæðið að hluta er í gildi og var staðfest með birtingu í b-deild stjórnartíðinda 31. mars 2006.
Í kjölfar umsagnar Veðurstofunnar er uppfærður texti í greinargerð um flóðamál. Í kjölfar umsagnar Umhverfisstofnunar hefur verið skerpt á texta um vernd vistkerfa. Í kjölfar umsagnar Gagnaveitu Reykjavíkur er gert ráð fyrir lóðum fyrir tengi- og spennistöðvar. Í kjölfar umsagnar Vegagerðarinnar er veghelgunarsvæði bætt við á uppdrátt. Aðrar breytingar sem gerðar hafa verið taka til kafla 5.5 í greinargerð þar sem texta um fjölda bílastæða er breytt m.t.t. fjölgunar þeirra, í kafla 6 er texti um lóðatöflu tekinn út og kvöð er sett á aðkomu að baklóðum raðhúsa.
Skipulags- og byggingarnefnd leggur til við bæjarstjórn að tillagan verði samþykkt og send Skipulagsstofnun til yfirferðar í samræmi við 42. gr. skipulagslaga nr. 123/2010.
Samþykkt samhljóða.