Lögð fram svohljóðandi fyrirspurn áheyrnarfulltrúa Sósíalistaflokks Íslands: Óskað er eftir skriflegu svari varðandi auð og ónotuð húsnæði. Nánar tiltekið er óskað eftir eftirfarandi upplýsingum: 1. Heildarfjöldi: Hversu margar fasteignir (íbúðir, húsnæði til annarra nota, lóðir með mannvirkjum) í eigu Reykjavíkurborgar standa tómar eða eru ónotaðar í dag? 2. Tímarammi: Hversu lengi hefur hvert húsnæði staðið autt? (Gert er ráð fyrir flokkun eftir tímabilum, t.d. 0–6 mánuðir, 6–12 mánuðir, yfir 12 mánuði). 3. Ástæður: Hverjar eru helstu ástæður þess að húsnæðið nýtist ekki? (T.d. viðgerðir vegna myglu/raka, bið eftir skipulagsbreytingum, fjármagnsskortur, eða annað). 4. Aðgerðaáætlun: Hver er áætlun sviðsins til að koma þessu húsnæði í notkun og hvaða tímarammi er settur fyrir úrbætur? 5. Kostnaður: Hver er áætlaður kostnaður við að gera húsnæðið nothæft og er fjármagn tryggt til þess í núverandi fjárhagsáætlun? 6. Rökstuðningur: Mikilvægt er að tryggja sem besta nýtingu á eignasafni borgarinnar, ekki síst í ljósi húsnæðisskorts og fjárhagsþrýstings. Upplýsingar um stöðu ónotaðs húsnæðis eru nauðsynlegar til að hægt sé að meta hvort rétt sé staðið að málum og hvort frekari aðgerða sé þörf.