Á afgreiðslufundi byggingarfulltrúa 2. desember 2025 var samþykkt umsókn, dags. 23. október s.l., um byggingarleyfi fyrir tveimur færanlegum kennslustofum auk tengibyggingar, mhl. 02, 03 og 04 í notkunarflokki 5, sem mun hýsa 24 börn og 5 starfsmenn á lóð nr. 17 við Hlaðbæ. Byggingarleyfi var gefið út 13. janúar 2026. Hverfisskipulag fyrir Ártúnsholt, Árbæ og Selás, sem öðlaðist gildi við birtingu í B-deild Stjórnartíðinda 5. nóvember 2019, gildir fyrir lóðina nr. 17 við Hlaðbæ. Með úrskurði úrskurðarnefndar umhverfis- og auðlindamála í máli nr. UUA2602024, dags. 4. maí 2026, var ákvörðun byggingarfulltrúa frá 2. desember 2025, um að samþykkja umsókn um byggingarleyfi fyrir tveimur færanlegum kennslustofum auk teng-byggingar á lóð nr. 17 við Hlaðbæ, felld úr gildi. Taldi úrskurðarnefndin að byggingarfulltrúa hefði borið að gefa íbúum sem eiga lögvarða hagsmuni kost á að kynna sér gögn málsins og koma sjónarmiðum sínum á framfæri áður en ákvörðun um útgáfu byggingarleyfisins var tekin skv. 13. og 14. gr. stjórnsýslulaga nr. 37/1993. Í samræmi við niðurstöðu úrskurðarnefndarinnar hyggst byggingarfulltrúi gefa lóðarhöfum sem eiga lögvarða hagsmuni kost að tjá sig um efni umsóknar um byggingarleyfi áður en umsóknin verður tekin til afgreiðslu á ný, sbr. 13. gr. stjórnsýslulaga nr. 37/1993.