Lögð fram svohljóðandi bókun fulltrúa Sjálfstæðisflokksins:
Fulltrúar Sjálfstæðisflokksins þakka fyrir fróðlega kynningu um byggingaframkvæmdir við leikskólann Brákarborg við Kleppsveg. Ljóst er að endurbygging leikskólans er eitt mesta klúður í byggingarsögu Reykjavíkurborgar. Ótal gallar voru á hönnun og endurbyggingu hússins, sem kosta munu skattgreiðendur ómælt fé. Eðlilegt er að kjörnir fulltrúar fylgist grannt með umræddum framkvæmdum, sem og kostnaðinum. Heildarkostnaður við Brákarborgarverkefnið var að minnsta kosti kominn í 2.399 milljónir króna í júlí 2024 á núgildandi verðlagi. Lagfæringar á burðarvirki voru boðnar út í október 2024 og var tilboði tekið að upphæð 223 milljónir. Áætluð verklok lagfæringa voru 1. febrúar 2025 en þeim er þó ekki enn lokið. Samkvæmt endurskoðaðri fjárfestingaráætlun, sem borgarráð samþykkti nú í október, hefur kostnaður við verkið hækkað verulega og er nú áætlaður 350 milljónir króna. Sennilega verður endanlegur kostnaður við lagfæringarnar þó enn hærri.