Lögð fram svohljóðandi bókun áheyrnarfulltrúa Sósíalistaflokks Íslands:
Áheyrnarfulltrúi Sósíalistaflokks Íslands minnir á að hreyfihamlaðir eru að mestu leyti útilokaðir frá endurvinnslustöðvunum þar sem þeir sem gætu komið á staðinn með sorpið sitt í eigin bifreið fá hvergi aðstoð við að losa bílinn. Á þetta sérstaklega við þá sem nota hjólastóla og geta ekki sveiflað hlutum upp fyrir sig og þannig upp í gámana. Sósíalistar hafa áður komið með tillögur um að Sorpa bjóði hreyfihömluðum að fá slíka aðstoð á afmörkuðum tímum og stöðvum en ekki hefur verið vilji til að koma þannig til móts við þennan hóp. Þykir Sósíalistaflokki það miður enda ákveðin mismunun fólgin í því að koma ekki til móts við þá hreyfihamlaða sem vilja endurvinna til jafns við aðra.
Lögð fram svohljóðandi bókun áheyrnarfulltrúa Flokks fólksins:
Skiptar skoðanir hafa verið á skipulagningu varðandi grenndarstöðvar og flokkun. Samkvæmt könnun vilja flestir geta losað sig við sem flest sem næst sínum heimilum. Auðvitað væri slík þjónusta bæði plássfrek og kostnaðarsöm og þess vegna skiptir máli skynsamleg dreifing stærri endurvinnslustöðva og gott aðgengi er þess vegna nauðsynleg hvað þetta varðar. Í umræðum í kjölfar kynningar var komið inn á ýmis atriði varðandi “hegðun fólks” varðandi losun sorps - eins og m.a. það að talsvert er um að fólk sé að losa sig við allskyns óskylt drasl í grenndarstöðvum sem ekki á þar heima. Í framhaldi af því voru kynntar ýmsar leiðir sem eru í skoðun sem hafa með m.a. með fyrirbyggjandi aðgerðir að gera. Það er mikilvægt að tekið verði á þeim sóðaskap sem orðið getur vegna slíkrar sorplosunar fólks á rusli sem ekki á heima á grenndarstöðvum og á að fara með beint á endurvinnslustöðvar Sorpu.