Lögð fram svohljóðandi bókun fulltrúa Samfylkingarinnar, Framsóknar, Pírata og Viðreisnar:
Vegna vinstribeygju strætó á þessum stað er ekki æskilegt að hafa þarna hefðbundið hringtorg. Talið er að forgangur Úlfarsbrautar fram yfir Urðarbrunn valdi auknum umferðarhraða og þar með auka líkur á alvarlegri umferðarslysum. Því er tillagan felld. Slys á árinu 2024 virðist ekki hafa haft með útfærslu gatnamótanna að gera.
Lögð fram svohljóðandi bókun fulltrúa Sjálfstæðisflokksins:
Borgarfulltrúar Samfylkingar, Framsóknarflokks, Pírata, Viðreisnar og Vinstri grænna hafa fellt tillögu Sjálfstæðisflokksins um úrbætur á gatnamótum Úlfarsbrautar og Urðarbrunns. Fjölmargir íbúar hafa óskað eftir úrbótum á umræddum gatnamótum þar sem ekki er skýrt hvort þar sé um hringtorg eða venjuleg gatnamót að ræða. Óvissa um slíkt hefur ítrekað valdið misskilningi og hættu. Umsögn samgöngustjóra um tillöguna, þar sem segir að ekki sé talin ástæða til að bregðast sérstaklega við, lýsir skilningsleysi á ríkjandi aðstæðum. Í umsögninni kemur að samkvæmt slysaskrá Samgöngustofu hafi orðið tvö umferðarslys á eða í nágrenni gatnamótanna, sem haft hafi í för með sér meiðsli á fólki. Upplýsingar vegna 2024 liggja ekki fyrir en 3. október það ár var ekið var á dreng á leið í skólann á umræddum gatnamótum. Drengurinn var fluttur á slysadeild í sjúkrabíl. Í frétt Vísis um málið kemur fram að lögreglan telji æskilegt að fyrirkomulag gatnamótanna verði skoðað m.t.t. öryggisaðstæðna. Samkvæmt slysakorti Samgöngustofu urðu fimm skráð óhöpp á gatnamótunum eða við þau á árinu 2023, tvö árið 2022, eitt árið 2021 og eitt árið 2019. Þar af var þrisvar ekið á fótgangandi við biðstöð og þrem sinnum var um að ræða árekstur tveggja bifreiða. Svo virðist sem óhöppum í og við umrædd gatnamót fari fjölgandi og er ábyrgðarlaust að bregðast ekki við slíkri þróun.