Fram fer kynning á starfsemi Strætó, nýjungum framundan og áskorunum. Áheyrnarfulltrúi Flokks fólksins leggur fram svohljóðandi bókun: Strætó stendur frammi fyrir fjölda áskorana. Starfsemi hefur gengið brösuglega. Um er að ræða byggðasamlag 5 sveitarfélaga. Þetta fyrirkomulag hentar illa fyrir starfsemi eins og Strætó. Reykjavík sem lang stærsti eigandi hefur ekki ákvörðunarvald í samræmi við stærð. Strætó hefur lengi riðið á barmi gjaldþrots og þarf sífellt að suða um meira fjármagn hjá eigendum sínum. Ástæður eru fjölmargar og má t.d. nefna dýr mistök vegna útboðs aðkeypts akstur og fleiri dómsmála. Mikil umræða og gagnrýni var á Klapp og gekk það kerfi verulega illa. Nú býður Klapp upp á snertilaus greiðslukort í gegnum síma eftir mikla fyrirhöfn og kostnað. Ennþá berast fréttir af vandamálum með kerfið. Fara hefði mátt mun einfaldari leiðir og það mikið fyrr sbr. sambærileg kerfi í mörgum öðrum borgum. Flokkur fólksins óskaði á sínum tíma eftir að gerð verði óháð úttekt á rekstri og þjónustu strætó. Tillagan var felld. Kvartanir yfir þjónustu Strætó telja mörg hundruð, sumar alvarlegar. Ekki er tekið nægilega vel á kvörtunum. Strætó hefur þjónustustefnu sem kannski er bara orð á blaði? Þegar svo mikið hefur gengið á hjá einu fyrirtæki eru sterkar líkur á að vandinn liggi hjá stjórnendum fyrirtækisins. Einhvers staðar er pottur brotinn og því mikilvægt að fá óháða úttekt á fyrirtækinu.