Til máls taka Bragi Bjarnason, D-lista, Arna Ír Gunnarsdóttir, S-lista, Sigurjón Vídalín Guðmundsson, S-lista, Fjóla St. Kristinsdóttir, D-lista, Arnar Freyr Ólafsson, B-lista, Sveinn Ægir Birgisson, D-lista, Álfheiður Eymarsdóttir, Á-lista, Ellý Tómasdóttir, B-lista og Helga Lind Pálsdóttir, D-lista.
Ársreikningur 2024 er borinn undir atkvæði og samþykktur með 10 atkvæðum. 6 atkvæðum bæjarfulltrúa D-lista, 1 atkvæði bæjarfulltrúa Á-lista, 2 atkvæðum bæjarfulltrúa B-lista og 1 atkvæði Örnu Írar Gunnarsdóttur S-lista. Sigurjón Vídalín Guðmundsson, bæjarfulltrúi S-lista situr hjá.
Hlé gert á fundi kl. 17:35.
Fundi fram haldið kl. 17:44.
Arna Ír Gunnarsdóttir, S-lista leggur fram eftirfarandi bókun bæjarfulltrúa B- og S-lista:
Bókun með ársreikningi:
Bæjarfulltrúar minnihlutans hafa marg bent á skynsemina í því að fara ætti hægar í sakirnar þegar gerð var áætlun um að bæta rekstur sveitarfélagsins. Þegar horft er á niðurstöðu rekstrar ársins 2024 þá er alveg ljóst að farið var í mjög íþyngjandi aðgerðir á of skömmum tíma í stað þess að horfa til þess að ná rekstrarbata yfir lengri tíma sem að ekki biti jafn illilega í hjá íbúum sveitarfélagsins. Að auki er það miður að ekki skuli hafa verið endurskoðuð ákvörðun um aukaálag á útsvar við 6 mánaða uppgjör sl. árs. Þá þegar sáust nægileg batamerki í rekstrinum þannig að meirihlutanum hefði verið í lófa lagið að láta staðar numið með innheimtu álags á útsvar. Þrátt fyrir að ánægjulegt sé að rekstrarbati hafi orðið óttumst við að hann hafi verið of dýru verði keyptur fyrir íbúa sveitarfélagsins. Undirrituð þakka starfsfólki sveitarfélagsins fyrir þeirra mikilsverða framlag til bætts reksturs með störfum sínum.
Arna Ír Gunnarsdóttir, S-lista
Sigurjón Vídalín Guðmundsson, S-lista
Arnar Freyr Ólafsson, B-lista
Ellý Tómasdóttir, B-lista
Hlé gert á fundi kl. 17:47.
Fundi fram haldið kl. 17:49.
Bragi Bjarnason, D-lista, leggur fram eftirfarandi bókun bæjarfulltrúa Á- og D-lista:
Bókun bæjarfulltrúa D- og Á-lista með ársreikningi 2024:
Niðurstaða ársreiknings sveitarfélagsins er mjög ánægjuleg og vilja bæjarfulltrúar D- og Á-lista þakka bæjarfulltrúum, starfsmönnum, ráðgjöfum og íbúum sem hafa gert það mögulegt að skila ársreikningi með rúmlega 3 milljarða rekstrarafgangi.
Niðurstaðan staðfestir að aðgerðir til hagræðinga, sala eigna og byggingaréttar ásamt öðrum tekjuaukandi aðgerðum, m.a. álagi á útsvar eru að skila viðsnúningi í rekstri sveitarfélagsins. Umrætt álag tryggði greiðsluhæfi sveitarfélagsins og styrkti lausafjárstöðuna en sameiginlega hafa alla aðgerðir einnig lækkað skuldaviðmiðið verulega milli ára þrátt fyrir umfangsmiklar fjárfestingar og viðhald innviða.
Meirihluti bæjarstjórnar fagnar þeim mikilvæga áfanga að samkomulagi sveitarfélagsins við Eftirlitsnefnd með fjármálum sveitarfélaga sem gert var 27. mars 2023 vegna alvarlegrar fjárhagsstöðu, hafi lokið formlega 1. maí sl. Niðurstaða ársreikningsins er til marks um að samstarfið hafi skilað góðum árangri og Sveitarfélagið Árborg sé á réttri leið.
Nú reynir á að sýna áframhaldandi ábyrgð í rekstri, standast áætlanir og gera A-hluta sveitarfélagsins sjálfbæran á næstu árum. Með þeirri vinnu tryggjum við að sveitarfélagið lendi aldrei aftur í þeirri erfiðu stöðu sem blasti við okkur árið 2022.
Stefna og markmið bæjarstjórnar Árborgar var og er að takast á við rekstur sveitarfélagsins með ábyrgum hætti. Við vitum að margar ákvarðanir hafa verið erfiðar og sársaukafullar íbúum og starfsfólki sveitarfélagsins en trúum því að þær séu að skila árangri, og skapi aðstæður til lækkunar annarra álaga til framtíðar, líkt og fasteignagjalda. Því íbúar eiga alltaf að njóta ávinningsins. Við í meirihluta bæjarstjórnar erum staðráðin í að halda áfram á þessari braut ábyrgðar og árangurs í þágu íbúa sveitarfélagsins.
Álfheiður Eymarsdóttir, Á-lista
Bragi Bjarnason, D-lista
Brynhildur Jónsdóttir, D-lista
Helga Lind Pálsdóttir, D-lista
Kjartan Björnsson, D-lista
Sveinn Ægir Birgisson, D-lista