Afgreiðslu málsins var frestað á 5. fundi bæjarstjórnar 21. september sl.
Á þeim fundi bæjarstjórnar var deildarstjóra félagsþjónustu og sviðsstjóra fjölskyldusviðs jafnframt veitt umboð til þess að fara í formlegar viðræður um aðild við stofnendur umdæmisráðs Kragans.
Á 16. fundi bæjarráðs, dags. 3. nóvember sl. var lagt fram minnisblað sviðsstjóra fjölskyldusviðs þar sem upplýst var um að áform um að vera í samstarfi við sveitarfélögin á höfuðborgarsvæðinu, Kragann, um umdæmisráð barnaverndar hafi ekki gengið eftir. Þá var haft samband við félagsmálastjóra Reykjanesbæjar um mögulegt samstarf en sveitarfélögin á Suðurnesjunum höfðu einnig sótt um samflot með Kraganum sem gekk heldur ekki eftir. Félagsmálastjóri Reykjanesbæjar tók vel í beiðni Árborgar. Niðurstaðan varð sú að sveitarfélögin á Suðurnesjunum lögðu til við bæjarráð sveitarfélaganna á svæðinu að stofnað yrði umdæmisráð fyrir Suðurnesin og samið yrði við skrifstofu samstaka sveitarfélaga á Suðurnesjunum um aðstöðu og aðbúnað fyrir fundi ráðsins. Þar var jafnframt upplýst um ósk Árborgar um að taka þátt í stofnun þessa umdæmisráðs þannig að stofnað yrði sameiginlegt umdæmisráð barnaverndar á Suðurnesjunum og Árborg sem úr varð.
Öll aðildarsveitarfélögin hafa samþykkt að taka þátt í stofnun umdæmisráðs fyrir sveitarfélögin á Suðurnesjum og Árborg. Haldnir hafa verið samstarfsfundir og eru nú tilbúinn lokadrög af samningi til samþykktar hjá bæjarfélögunum. Auk samnings er meðfylgjandi erindisbréf fyrir valnefnd umdæmisráðs fyrir sveitarfélögin á Suðurnesjum og Árborg. Jafnframt er óskað eftir því að deildarstjóri velferðarþjónustu verði tilnefndur fyrir hönd sveitarfélagsins í valnefnd umdæmisráðs barnaverndar. Valnefndin starfar í umboði sveitarstjórna þeirra sveitarfélaga sem aðild eiga að umdæmisráði barnaverndar á Suðurnesjum og í Árborg. Hlutverk nefndarinnar er að velja ráðsmenn í umdæmisráð, skipa nýja ráðsmenn á tímabilinu gerist þess þörf og fjalla um hugsanlegt vanhæfi ráðsmanns komi upp vafi um hæfi skipaðs ráðsmeðlims. Valnefnd fundar minnst tvisvar sinnum á ári en oftar ef þurfa þykir. Seta í valnefndinni er ólaunuð.
Lagt er til við bæjarstjórn að samningur um rekstur umdæmisráðs barnaverndar fyrir sveitarfélögin á Suðurnesjum og í Árborg verði samþykktur.
Þá er lagt til að deildarstjóri velferðarþjónustu Árborgar verði tilnefndur f.h. Sveitarfélagsins Árborgar í valnefnd umdæmisráðs barnaverndar fyrir sveitarfélögin á Suðurnesjum og í Árborg.