Sveitarfélagið Árborg hefur að undanförnu unnið að heildarendurskoðun aðalskipulags Árborgar. Tillagan hefur verið kynnt íbúum á opnum fundum á Eyrarbakka, Stokkseyri og Selfossi. Aðalskipulag er skipulagsáætlun sem tekur til alls lands innan marka sveitarfélagsins. Í aðalskipulagi er sett fram stefna sveitarstjórnar um þróun sveitarfélagsins varðandi landnotkun, byggðaþróun, byggðamynstur, samgöngu- og þjónustukerfi og umhverfismál.