Lögð fram svohljóðandi bókun fulltrúa Samfylkingarinnar, Pírata, Sósíalistaflokks Íslands, Vinstri grænna og áheyrnarfulltrúa Flokks fólksins:
Við þökkum fyrir góða kynningu á þeirri öflugu áætlun um endurnýjun og innleiðingu á snjallljósastýringu á Höfuðborgarsvæðinu sem nú er á lokastigum. Bæði skiptir það máli upp á að bæta umferðaröryggi og draga úr töfum í umferð, en jafnframt býður snjallljósastýring sem þessi upp á það að neyðarbifreiðar og almenningsvagnar geti fengið forgang á gatnamótum. Þetta er mikilvægt samstarfsverkefni og hluti af Samgöngusáttmálanum.
Lögð fram svohljóðandi bókun fulltrúa Sjálfstæðisflokksins og Framsóknarflokksins:
Úrbætur á stýringu umferðarljósa í Reykjavík eru löngu tímabærar í því skyni að auka umferðaröryggi, bæta umferðarflæði og draga úr mengun í borginni. Nýta þarf kosti tölvutækni betur en nú er gert til að ná þessum markmiðum. Miklir möguleikar eru fyrir hendi til að besta stýringu umferðarljósa út frá gögnum, sem aflað verði með skynjurum á umferðarljósum. Ánægjulegt er að verið sé að stíga skref í þessu skyni í Reykjavík en í ljósi góðrar reynslu erlendis frá er full ástæða til að stíga stærri skref og hraða innleiðingu þessarar tækni við umferðarljósastýringu í borginni.