Lögð fram svohljóðandi bókun fulltrúa Sjálfstæðisflokksins:
Borgarfulltrúar Sjálfstæðisflokksins hafa lengi lagt til að snjalltækni verði nýtt í stórauknum mæli til að stýra umferð í Reykjavík. Ljóst er að mikil tækifæri eru fyrir hendi til að stýra umferðarljósum í þágu aukins umferðaröryggis og umferðarflæðis gangandi, hjólandi og akandi vegfarenda. Miklum tíma og fjármunum er sóað með umferðartöfum á höfuðborgarsvæðinu og ljóst að sá kostnaður nemur tugum milljörðum króna á ársgrundvelli. Umferðarslys valda miklu fjárhagslegu tjóni í borginni og hafa að auki í för með sér líkamlegan og andlegan skaða fyrir fjölmarga einstaklinga. Í mörgum erlendum borgum hefur snjalltækni við stýringu umferðarljósa skilað miklum árangri við að draga úr umferðartöfum og -slysum, sem Reykjavíkurborg getur lært af. Með uppsetningu skynjara á umferðarljósum er hægt að hámarka gæði stýringarinnar stórbæta þannig umferðaröryggi og umferðarflæði í þágu allra vegfarenda. Þessi tækifæri ber að nýta og er enn og aftur lagt til að vinnu vegna snjallvæðingar umferðarljósa verði hraðað eins og kostur er.