Lögð fram svohljóðandi bókun fulltrúa Samfylkingarinnar, Framsóknar, Pírata og Viðreisnar:
Ánægjulegt er að sjá aðgengisúrbætur hjá strætó. Verið er að innleiða notkun Navilens blindralesturskerfisins á strætóskýlum og bæta festingar fyrir hjólastóla í vögnunum. Í appinu er meðal annars búið að stækka valmynd en unnið er að því að uppfæra kortið og gera það auðlæsilegra. Sömuleiðis er verið að merkja allar biðstöðvar sem eru aðgengilegar sem mun stórauka fyrirsjáanleika fyrir fatlað fólk þegar það er að skipuleggja sínar ferðir.
Lögð fram svohljóðandi bókun fulltrúa Sjálfstæðisflokksins:
Borgarfulltrúar Sjálfstæðisflokksins fagna umbótum hjá Strætó bs. varðandi upplýsingagjöf með svokallaðri Navilens-tækni í þágu blindra og sjónskertra. Minnt er á fyrri tillögur og ábendingar um almenna upplýsingagjöf Strætó bs., sem víða er ábótavant. a) Æskilegt er að allar biðstöðvar, sem fram undan eru, séu sýndar á leiðaspjöldum á biðstöðvum. b) Bæta þarf merkingar á skiptistöðvum, t.d. í Mjódd og við Skúlagötu, með því að setja þar upp kort af leiðakerfi Strætó í heild sinni. c) Bæta þarf merkingar á Lækjartorgi. Um er að ræða þrjár biðstöðvar, sem aðgreindar eru með bókstöfunum A, B og C. Rúmlega hundrað metrar og fjórar akreinar skilja að biðstöðvar A og C við Lækjargötu en biðstöð B er við Hverfisgötu. Æskilegt er að hver biðstöð á Lækjartorgi verði merkt með viðeigandi bókstaf með áberandi hætti, strætisvagnafarþegum til glöggvunar. d) Æskilegt er að upplýsingar um biðstöðvar leiða, séu sýndar með skýrum, línulegum merkingum í viðkomandi strætisvögnum, eins og tíðkast víða erlendis, farþegum til glöggvunar.
Lögð fram svohljóðandi bókun áheyrnarfulltrúa Flokks fólksins:
Borgarfulltrúa Flokks fólksins líst vel á verkefnið. Stafræn umbreyting sem þessi er auðvitað löngu tímabær og í raun hefði mátt byrja á þessu mun fyrr. Eins og flestir vita komu upp ákveðin vandamál á sínum tíma varðandi innleiðingu og virkni Klapp appsins sem tengdust snertilausnum og öðru - þess vegna skiptir miklu máli að innleiðing þessarar lausnar gangi sem best fyrir sig. Hér er um mikilvægar umbætur á aðgengismálum að ræða. Í kjölfar kynningar urðu m.a. umræður um merkingar á strætóskýlum sem þyrfti að bæta vegna þess að aukinn sjáanleiki hvað varðar leiðir og annað, væri til mikilla bóta fyrir þá sem nota strætó - samhliða lausnum eins og þeirri sem kynningin kemur inn á.