Samþykkt. Fulltrúar Sjálfstæðisflokksins sitja hjá við afgreiðslu málsins.
Lögð fram svohljóðandi bókun fulltrúa Samfylkingarinnar, Framsóknar, Pírata og Viðreisnar:
Við fögnum fyrirhuguðum breytingum á gatnamótum Grensásvegar og Ármúla/Skeifunnar sem er ætlað að tryggja aðgengi og öryggi þeirra sem eru fótgangandi. Fjöldi gangandi vegfarenda sem fara um þessi gatnamót hefur aukist. Vegna mikillar uppbyggingar íbúða við þessi gatnamót, skólahúsnæði á svæðinu og fyrirhugaðrar uppbyggingar í sjálfri Skeifunni verður ekki hjá því vikist að fara í þessar framkvæmdir. Við vekjum jafnframt athygli á því að æskilegt er að fara í sambærilegar breytingar á gatnamótum Fellsmúla og Grensásvegar og einnig að gera Grensásveg milli Miklubrautar og Suðurlandsbrautar öruggari og þægilegri fyrir gangandi vegfarendur áður en langt um líður.
Lögð fram svohljóðandi bókun fulltrúa Sjálfstæðisflokksins:
Fulltrúar Sjálfstæðisflokksins styðja aðgerðir í því skyni að auka öryggi gangandi vegfarenda við gatnamót Grensásvegar og Ármúla, t.d. með miðeyjum og upphækkuðum og vel lýstum gangbrautum. Unnt væri að ná enn meiri árangri með skynjaratengdri snjallljósastýringu og er sviðið hvatt til að innleiða slíka tækni á umræddum gangbrautum. Hins vegar er líklegt er að þrenging Grensásvegar hafi í för með sér auknar umferðartafir og stíflur. Því er varað við slíkri þrengingu og lagst gegn henni.
Lögð fram svohljóðandi bókun áheyrnarfulltrúa Flokks fólksins:
Fulltrúi Flokks fólksins fagnar öllum þeim aðgerðum sem auka aðgengi og öryggi gangandi vegfarenda. Miklar breytingar hafa átt sér stað á þessu rótgróna verslunar- og þjónustusvæði og því tímabært að huga að þeim þáttum sem þarna er um rætt. Á þessu svæði er eins og allir vita, oft mikil umferð að verslunum og þjónustu og einnig á annatímum vegna stórra stofnbrauta í næsta nágrenni. Það er því ljóst að þétting byggðar á umferðarþungum svæðum sem þessum, þarf að tryggja öryggi gangandi vegfarenda eins og kostur er - eins og þarna er verið að gera. Það hefur því miður ekki alltaf verið svo eins og sorgleg dæmi eru um. En þarna á líka að fækka akreinum í báðar áttir á Grensásvegi sem þýðir að sú umferð sem þar hefur farið um gæti mögulega orðið enn þyngri en nú er. Vegna þess gæti svo einhver hluti þeirrar umferðar leitað annað með tilheyrandi álagi á þau svæði sem fyrir því verða. Þó að fagnað sé bættu aðgengi og öryggi gangandi vegfarenda á þessum gatnamótum gætu orðið til önnur vandamál á öðrum svæðum í kjölfarið - og alls óvíst hvernig aðgengi og öryggi gangandi vegfarenda á þeim svæðum er háttað.