Tillögunni er vísað til meðferðar í stýrihóp um gönguvæna borg.
Lögð fram svohljóðandi bókun áheyrnarfulltrúa Flokks fólksins:
Fulltrúi Flokks fólksins tekur undir með íbúaráði Háaleitis- og Bústaðahverfis um bætt umferðaröryggi í Safamýri. Kjarninn í þessari tillögu er sá að hlúð verði eins vel og hægt er að öryggi gangandi vegfarenda - sérstaklega hvað varðar töluverða umferð barna og unglinga sem eiga þarna leið um á hverjum degi. Í tillögunni koma fram ýmis atriði og uppástungur sem miða að því að bæta aðgengi og öryggi. Íbúaráðið leggur fram í tillögu hugmyndir að ákveðnum lausnum varðandi bílastæðamál. Þrátt fyrir allt þetta kemur fram í umsögn samgöngufulltrúa að ekki sé ástæða til þess að leggjast í heildstæða úttekt á götunni og er vísað í niðurstöður samantekta og mælinga - að þar hafi ekki verið mikið um slys eða önnur óhöpp undanfarin ár. Fulltrúinn verður að benda sérstaklega á þetta í umsögninni - vegna þess að hann telur að ekki eigi að þurfa alvarleg slys á fólki til þess að hægt sé að ráðast í það að bæta öryggi gangandi vegfarenda. Þess vegna er fulltrúinn sammála tillögu íbúaráðsins og telur þau rök sem þar eru færð fram fullnægjandi til þess að farið sé í umbeðna úttekt á öryggi barna og unglinga og annarra gangandi vegfarenda í götunni.